Երկար ժամանակ հետևելով մեր համաքաղաքացիների fashion նախասիրություններին՝ վստահորեն կարող եմ ասել՝ հայ աղջիկների մեծ մասը, երազելով հարսանիքի մասին, ինքն իրեն առավել հաճախ պատկերացնում է «Elie Saab» զգեստով: Բեյրութցի դիզայները, անշուշտ, գիտի, թե ինչ է պետք կանանց, ինչի շնորհիվ գերել է նրանց սրտերը ամբողջ աշխարհում և Հայաստանում: Նրա ոճը միաձուլում է կանացիությունը, արքայավայել շքեղությունը և իսկական գլամուրը: Հնարավոր է՝ հենց այդ պատճառով հոլիվուդյան աստղերը հենց Elie Saab-ի զգեստներն են ընտրում տարատեսակ կարմիր գորգերի համար:
Elie Saab-ը չի ստեղծում էքստրավագանտ կամ բարդ ճարտարապետական ձևվածքի զգեստներ, չի ընկնում միտումների ետևից և նույնիսկ չի փորձում դրանք թելադրել: Նա պարզապես առաջարկում է այն, ինչը սիրում են կանայք՝ նրբագեղ և շքեղ զգեստներ: Նույն կերպ կարելի է բնութագրել նաև նրա օծանելիքը՝ «Elie Saab Le Parfum»-ը: Ի դեպ, բույրի հեղինակը մեր հայրենակից Ֆրանսիս Կյուրգջյանն է: «Բույրը արտացոլում է իմ ներաշխարհի երկակիությունը՝ Արևելքի լույսը և ժամանակակից արևմտյան աշխարհը»,- ասում է Elie Saab-ը:
Ոչ բոլորին է բախտ վիճակվում կրել Elie Saab-ի haute couture զգեստը, բայց օծանելիքը գործածում են շատերը: «Elie Saab Le Parfum»-ի շնորհիվ ամեն կին կարող է իրեն արքայադուստր զգալ, հոլիվուդյան աստղ և պարզապես շատ գեղեցիկ կին:
No comments:
Post a Comment